Bas bulan pe sepuluhken, paksa bulan purnama raya singgah kapal Kapten Chang i Belawan. Paksa e kapalna dem alu keramik-keramik si mejile rikut pe ras piga-piga perbinaga i Tiongkok nari. Biasana kalak enda erbinaga i Tiga Lau Bau Cih, Berastagi. Seh berita man Perlanja Sira kerna kerehen kapal Kapten Chang e. Emaka turah ukurna gelah njumpai kapten e.
Seh kenca ia i Belawan, idahna kapal Kapten Chang enggo masang layarna. Kapten kapal rasa anak buahna pe sangana ersikap lako mulih mulihi ku Tiongkok. Teridah galang kel kapal e perbahan angin si rembus meter erbahan layarna teridah mbelang. Reh ka me akal Perlanja Sira e gelah banci ia ikut sekali ku Tiongkok.
”Ko Chang, banci kange ikut aku ras kam sekali ku Tiongkok?” nina Perlanja e man Kapten Chang.
”Lang…! La banci,” nina Chang erjabab alu sora megang. Enterem nge kalak meteh makana labo pernah ise pe banci ngikutken Chang tare kapalna, apai ka seh ku Tiongkok. Tapi Perlanja sira e la keri akalna perbahan gedangna urat takalna.
”Adi bage, la kam merawa adi aku ikut ras kam?” nina ka perlanja e alu sora kurang gangna. Bagi si enggo-enggona, angin lawit paksa e tetap denga meter erbansa Chang la megi alu tangkas kai si ibelaskan Perlanja e.
”Lang… Lang ningen ndai nari. Nungkun kam lalap!” nina kapten e alu emosi. Tempa-tempa la lit cara ngerana si deban. La tehna kepeken perban ia merawa lanai idahna cupingna erbahanca ia enggo kena siding Perlanja e.
Adi bage mantap, nina Perlanja e bas pusuhna.
Sope kenca berkat, nusur me Chang erbahan kata lako lawes nadingken Belawan. Ersemulih cakap me ia man Datuk Pulu Lawen si erkuasa i daerah e.
”Berkat ndai dage kita silih?” nina Perlanja e man Kapten Chang. Perlanja e tuhu-tuhu enggo ersikap perbahan uncang-uncangna pe enggo enggo sikap ikadangna.
”Eh… Uga ka kin katandu ena. Ndai gia ma enggo kukataken labo kam banci ikut,” nina ka kapten e ngaloi.
”Lang uga katandu. Ningku ndai ma, la kam merawa adi aku ikut ras kam? Lang nindu. Enda je melala saksina. Datuk kuta enda pe je.”
”Ih.. Uga maka bage” megara mbiring ayo Kapten Chang.
”Bagi si enggo eteh kami maka kam kalakna si ngkunduli cakap. Pala gundari lanai kin,” nina ka perlanja e ngaloi janahna cirem-cirem. Enggo dung kel anak e, nina Perlanja bas ukurna.
”Payo nge e, Kapten. Kami jenda saksina kerina. Emaka kundulilah cakapndu. Ola kam rusursa emosi. Mejin kam kari adi emosi, bage pe lampas kam kari metua…” nina ka Binajo, Bibi Nade Jengok janahna nontil. Ban galangna sontilna, banci pengsan anak biang ibenterna, apai ka anak manok, banci mate.
”Payo katandu ena, kukunduli denga nge cakapku. Adi bage kin ndai si ibegindu, sekali enda banci kam ikut ras aku,” nina ka Kapten Chang alu dem wibawa. Tuhu-tuhu ia teridah kalak si banci jadi pemmpin sada kapal galang si melala anak buahna. Kapal si perdalanna labo ndeher, tapi lintas Tingkok-Sunda Kelapa-Pulau Berhala seh ka ku Belawan.
Emaka seh berngina berkat me kapal Kapten Chang rikut pe Perlanja Sira e mulihken ku Tiongkok. Ibaba kalak enda melala beras, sira ras gundur. Gundur e labo macik gia ndekah bas dalan, tapi reh dekahna gundur e reh tabehna sebab susunna i teruh papan i geladak kapal. Bagem pemeteh si idat Kapten Chang sangana reh ku juma Pa Belin.
***
Tande warina, tande mingguna rikut pe tande bulanna. Bulan peduakan seh me kalak enda i kuta Kapten Chang, i Tiongkok. Minter kalak enda lawes ku istana alu pengawalan pasuken kuda si lengkap lembing ras kelewangna. Mbelang kepeken doni enda, kuakap kin mbarenda berteng Delang Sinabung nari seh Binje ngenca, ate Perlanje e bas ukurna. Janah kerna Kapten Chang e sekalak putra mahkota pe edenga nge ietehna. Memang ia sekalak putra mahkota, tapi meriah akapna erlayar ku negeri-negeri si deban.
Kira-kira jam siwah pepagina, idilo Kapten Chang me Perlanja Sira e ku ruang rapatna. Reh Perlanja e alu langkah si mantap ras percaya diri si mejile. Piga-piga penasehat Kapten Chang e pe kepeken Kalak Karo si tuhu-tuhu beluh ras meganjang pemetehna.
Tedis me Kapten Chang, jenari ngerana ia, ”Hari ini aku mengangkat Perlanja ini jadi Menteri Kesejahteraan Rakyat. Apa yang diperintahkannya harus dipatuhi,” nina Chang alu sora ras mata si tegas.
”Siap Raja,” nina kerina si pulung ije.
Piga-piga wari kenca iangkat jadi kepala, mulai me erdahin Perlanja e sesuai perintah Kapten Chang. Alu jujur nge ia ngaku maka labo tehna kai si arus ilakokenna. Tapi sada penungkunen bas pusuhna: ”Engakai maka aku iangkat jadi menteri?” Em penungkunen bas pusuhna. Tapi lenga terjawabna. Emaka edalan-dalan me ia ku kerina kuta-kuta. Bas tiap-tiap kuta iidahna maka melala dengan kalak musil si man sampaten. Turah atena mekuah. Iukurina me sada akal uga banci nampati kalak enda kerina.
Sada minggu kenca si e, reh ka ia mulihi ku kuta-kuta si ndube. Melala ibabana beras ras gandum ulih latihna. Melala i tukurna beras ras gandum alu senna sisada ibas upah si alokenna selaku sekalak menteri istana.
”Terima kasih banyak Pak Menteri. Anda sangat baik pada kami, raja sendiri belum pernah melakukan hal seperti ini. Kiranya Tuhan memberkati Anda,” nina jelma si enterem. Meriah kel akap kerina anak kuta e perbahan tersampati geluhna.
”Ini semua raja yang menyediakan. Karena itu bersuka citalah,” nina Perlanja e ngaloi jelma si enterem.
”Benar-benar raja telah berubah,” nina ka jelma si enterem sapih-sapih ia.
Bagem Perlanja Sira si enggo jadi menteri e ngelakoken dahinna alu setia ras ate mekuah. Tiap-tiap lit bencana bage pe kekurangen nakan, minter ia reh mereken penampat atas nama raja.
Kenca puluhen tahun ia i Tiongkok terjadi sada hal di luar dugaan. Terjadi pemberontakan perbahan lit pejabat istana si lanai setia man kerajaan perbahan perebuten jabaten. Piga-piga kalak pejabat istana ndube sekongkol lako penusur raja ibas kekuasaanna nari. Si ibiarken Perlanja e tuhu-tuhu terjadi. Raja negeri e, Kapten Chang i pelawes ibas istana nari janah la ibere penghormaten kai pe selaku kalak si pernah jadi pemimpin negeri e. Seh kel biarna Raja Chang perbahan lanai lit si ngernagi ras ngormati ia. I jumpaina mulihi Perlanja Sira si tetap denga setia man ia.
”Perlanja, ngolihi tuturta bagi si ndube, ersilih. Aku lanai bo raja. Lanai bo lit inganku tading pe.” nina Chang man Perlanja e alu sedih janahna tungkuk.
”Ula kam mbiar Silih. Genduari lawes kita ku Kuta Negeri Merdeka. Jah kita kari erjuma” nina ka Perlanja e ngaloi. Ia pe lanai tehna kai si man katanken.
Emaka berkat me kalak enda duana. Piga-piga wari bas perdalanen erbahan ukur kalak enda lanai sedihsa kel. Melala idat Chang pengalaman bas Perlanja Sira e nari perbahan gel-gel pe ia terbiasa erdalan ndauh janah mentasi kerangani mbelang. Tempa-tempa akapna i kerangen Sibolangit.
Seh me kalak enda i kuta e, kira-kira jam lima karaben. Lit anak kuta si leben mulih ku kuta e maba berita kerna kerehen Menteri ras Raja Chang e. Emaka kerina anak kuta ngalo-nglao kalak enda alu erbahan barongsai tanda meriah ukur. Sengget kalak enda duana.
”Mari ke rumah kami…. Mari ke rumah kami…,” nina jelma si enterem.
Minter i baba jelma si enterem kalak enda ku rumah Pulu Kampung. Je kalak enda man ras erbengi. Meriah ukur Chang perbahan lit denga si ngalo-ngalo ia. Pepagina lampas Chang medak, isungkunna anak kuta kerna pengalo-pangalona kerina.
”Bibi, mengapa orang kampung ini begitu baik menyambut kami?”
”Raja, bagaimana tidak kami menyambut kalian. Setiap kami kekurangan makan karena musim kemarau, Menteri Perlanja itu selalu datang membantu kami. Lihat saja di lumbung kami, masih banyak tumpukan gandum yang tersisa. Itu semua karena kebaikan kalian?” nina Ibu Lay Yang alu iluh erdire.
”Maksudnya?” nina Chang kemamangen.
”Menteri Raja selalu mengatakan kalau bantuan yang diberikan atas perintah Raja” nina ka Ibu lay.
Dungna Kapten Chang ngangka kai si selama enda ilakoken Perlanja, menterina e. Ingetna mulihi sanga ibuali Perlanja Sira e ia i Belawan mbarenda. Kepeken ia sekalak si mehuli ras melala akalna.
Alu menteri si tetap setia ras rakyat si ngkelengi ia, isusun Chang me sada rencana. Telu tahun kenca e, Chang berhasil ngolihi jadi raja janah iangkatna Perlanja Sira jadi Penasehat Raja. Raja Chang merentah alu bijaksana erbahan rakyatna pe tambah makmur.
Komentar Terakhir